Yacharina: CH’ILLKAMANTA LLIKT’A RUWARIYTA (CÑ 176)

CENDA / 19 de Octubre de 2020.– Llikt’a ruwayta yacharisunman, imataq llikt’a?, llikt’aqa coca aswan misk’i akullinapaq, may unaymanta kuraq tata, kuraq mamanchik ajinatapuni akulliq kanku. Paykuna kikin llikt’ataqa ruwakuq kanku. Periódico «Conosur Ñawpaqman» comunidadespi puriykacharimun, runawan parlarimun. Kunantaq llikt’a ruwaymanta ñawirisun. 

Ch’illka llikt’ita misk’i, k’achitu queso quesolla, jatun llaqtamantaqa llikt’a mana misk’ichu, kachiyuq jina, k’ara, mana allinchu, kay llikt’aqa k’achitu, misk’sisitu.

LLIKT’A RUWANAPAQ, KAYKUNATA WAKICHINA:

UK. Ch’illka sachitamanta k’aspisitusninta k’uturana, chayta ch`akichina.

ISKAY. Ch’illka k’aspisitusta inqhana q`ulachinakama, yuraqman tukunankama.

KIMSA. Ch’illka uchphanta yakituwan chhapurquna, chaywan muruq´itusta ruwana.

TAWA. Chay uchpha muruq’ituta ch’akichina, chakispaqa uktawan q’ulachina.

PHICHQA. Chay muruq’itustaqa pali papita chayachiytawan kutarina, tinkuchina allinsituta, t’antapaq masa kikin kanan tiyan.

SUQTA. Tinkuchiytawan, makiwan chhuqu chhuqituta ruwana. Llikt’aqa cocata akullinapaq, cocaqa kallpata quwanchik, yarqhayta, llakiyta, sayk’uyta chinkachin. Cocaqa q’uñi jallp’aspi puqun.Chaqra llank’aq wawqi masiqa chaytawanpuni kay Norte Potosipi coquitanta akullikunku.

Kaytaqa willariwanchik: Mauricia Villca Saca, Comunidad Cayo Cayo, Norte Potosi.

Kayta comunidadpi mask’arimun: Brtzabé Saca