Wayk’urikuna: Chaqra patapi puquywan Jat’aqu Piqtu ruwarina

 “Kay q’umir tiempoqa tukuy imitata wayk’urikunchik, chaqra patapiqa tiyan tukuy laya q’umir puquy. Tiyan verdolagas, tiyan jat’aqu, tiyan kiwna laqhi, q’umir habas ima piqtu ruwarikunapaq. May kusiy kay paray q’umir tiempoqa. Kunan willarisqaykichik imaynata jat’aqumanta piqtu ruwakun”. Niwanchik mama Sinforosa.

Chaqra ajinata puqupuwanchik

Tukuy laya q’umirkunata puquchinchik

Puquyninchikmantaqa tukuy imata wayk’urikunchik

Wasipiqa wayk’usqa mikhunapuni misk’iqa

_________  JAT’AQUMANTA PIQTU  _________

WAKICHIKUNA (Phichqa runapaq)

• Uk marq’a jat’aqu (wakinpaq cojopollo, yuyu)
• Uk kilo t’una imilla papa.
• Uk vaso ch’uñu chullusqa, takasqa.
• Kimsa cuchara aceite.
• Iskay uma cebollas ch’iñi picasqita.
• Iskay kiru ajos picasqita.

IMAYNATA WAYK’UNA

Jat’aquta mayllarquytawan, achka yakupi chayarpachina, chaymanta ch’umarpaytawan, ch’uñu takasqata jina murq’upi ch’irwana. Chay muq’utataq cuchilluwan picarpana.

Imilla papata pelaytawan chayachinallataq, ch’uñu takasqata chayachinallataq.

Chaymanta mankapi aceite, cebolla, ajos picasqata, uk chhika kachiyuqta chayachina, mana ch’akirpananpaq uk chhika yakuta yapaykuna.

Chay mankamantaq papa, ch’uñu chayasqata, jat’aqu picasqata kachaykuna, mama cucharawan piqturpana.

Chuwapi qarakuna, patanman quesillo t’akaykuna. Misk’ichari, wayk’uriychik. Chaylla.

Jat’aqu piqtu

Kayta atinki ñawiriyta periódico bolingue «Conosur Ñawpaqman» 170 yupaypi.

JR.